Verán de 2026: Leïla Slimani e Amy Levy
Ao longo desta semana sairán para o domicilio das persoas subscritoras as dúas novidades do trimestre que principia en xullo, e deseguida empezarán a distribuírse tamén en librarías e outras canles comerciais.
Por unha banda, presentamos unha das grandes pezas da literatura francesa contemporánea, Doce arrolo, de Leïla Slimani. Galardoada co Premio Goncourt 2016, trátase dunha historia a medio camiño entre a fábula tráxica e o thriller psicolóxico, inspirada nun caso real e que destila un suspense hipnótico. A tradución francés-galego correu a cargo de Isabel Soto.
Coa publicación deste título en concreto (no que temos postas non poucas expectativas), gustaríanos aproveitar para destacar o magnífico exemplo que representan Gonzalo Pérez e Maribel Tato, da libraría Cartabón, no relativo ao trato dispensado ao libro galego, e dun xeito especial ao libro galego traducido. Cadra que hai agora catro anos foi Gonzalo quen nos recomendou a lectura de Doce arrolo e nos animou a mercar os dereitos para o galego. Dende o seu negocio localizado na viguesa rúa de Urzaiz, que conta cun impresionante fondo, esta parella de libreiros escoita os lectores e lectoras e ofrécelles consellos profesionais, sempre fiables; dende o seu elo na cadea do libro, a súa é unha medicación acertada que ás veces, coma neste caso, dá froitos poderosos e que oxalá non pasen desapercibidos. Grazas, pois, á familia de Cartabón, a quen en gran medida se debe que hoxe esta estarrecedora novela, Doce Arrolo, estea, por fin, en galego.
Por outra banda, publicamos un retrato pioneiro dos anhelos e limitacións das mulleres na sociedade tardovitoriana, consonte o modelo feminista da «Nova Muller», en tensión cos roles máis tradicionais: a novela da británica Amy Levy intitulada O estudio fotográfico, de cuxa tradución dende o inglés se encargou María Reimóndez. Pola combinación de humor, sensibilidade e visión social, parécenos que a obra vai alén da novela romántica, pois contén unha lúcida e pertinente reflexión sobre o traballo feminino, a autonomía persoal e o prezo da liberdade nun mundo masculinizado. Tamén este título cremos que pode interesarlles a lectores e lectoras galegos de hoxe en día.
Así pois, boas lecturas e bo verán.
