Tanto pola súa calidade coma pola sutil diagnose dunha sociedade en crise (velaí o choque cultural e político entre a Rusia tradicional e as influencias provenientes de Europa), esta novela, a penúltima de Turguénev, segue a considerarse un fito da literatura universal.

Novela da prolífica Amelia B. Edwards ambientada na Prusia posnapoleónica onde a particular relación entre unha cativa, Gretchen, e monsieur Maurice, un enigmático prisioneiro, destapa unha intriga marcada polo suspense e algún que outro elemento sobrenatural.

Éxito editorial da austríaca Brigitte Schwaiger que, tras publicarse en 1977, vendeu case medio millón de exemplares no conxunto de territorios xermanófonos e se erixiu nunha das dez novelas en lingua alemá con mellor acollida internacional no século XX. Conta a historia dunha muller nova a quen a monotonía da existencia cotiá a canda o seu controlador marido fai que caia na desesperanza.

Novela epistolar de Jane Austen que subverte os códigos da novela romántica cunha protagonista manipuladora e capaz de subxugar a quen se lle poña por diante para acadar un status vantaxoso.

Novela de Amalie Skram tan estupenda como desacougante que xira arredor dunha guerra conxugal entre o experimentado capitán Adolph Riber e Aurora Ingstad, unha moza de dezasete anos. Un clásico do rupturismo moderno escandinavo.

Inspirada parcialmente na vida do músico estadounidense Billy Tipton, esta novela de exuberante prosa reportoulle á escocesa Jackie Kay o prestixioso Premio de Narrativa auspiciado por The Guardian a finais da década de 1990.

Emotivo e conmovedor relato ao redor da vellez, a dependencia ou a empatía, no que a palabra se erixe como un elemento crucial. De Vigan conta a historia dunha anciá, Michka, que sofre a paulatina perda da facultade de se comunicar.

Novela de Anita Brookner que, partindo do máis de medio século de amizade entre os protagonistas, Hartmann e Fibich, fala das complicacións da idade adulta, decote indisociables da nenez.

Clásico de Gustave Flaubert de inmensa influencia, tanto polas súas escenas memorables coma polas innovacións. O fío condutor é un mozo de provincias que se traslada a París e verá fracasadas todas as súas expectativas e ilusións. A súa historia de amor cunha muller casada bastantes anos maior ca el, inspirada en feitos autobiográficos, é o motor da trama.