Novela que, partindo do máis de medio século de amizade entre os protagonistas, Hartmann e Fibich, fala das complicacións da idade adulta, decote indisociables da nenez.

Talvez a peza máis lograda dentro da abondosa produción de narrativa breve de Elizabeth Gaskell. Trátase dunha obra sutil que contrapón a realidade labrega e o mundo industrializado. Salientan o humor e a fluidez imprimida á trama e mais a autonomía e a complexidade da personaxe protagonista.

Poderosa novela curta que aborda o racismo padecido pola comunidade afroamericana e retrata a humanidade e a compaixón a través do dilema ético que se lle presenta ao personaxe do doutor.

Clásico de inmensa influencia, tanto polas súas escenas memorables coma polas innovacións. O fío condutor é un mozo de provincias que se traslada a París e verá fracasadas todas as súas expectativas e ilusións. A súa historia de amor cunha muller casada bastantes anos maior ca el, inspirada en feitos autobiográficos, é o motor da trama.

«Thérèse Desqueyroux son eu, desesperado», afirmou François Mauriac a imitación do dito por Flaubert sobre Madame Bovary. Obra ambigua, complexa e dunha gran riqueza literaria que un xurado especializado recoñeceu como unha das doce mellores novelas en lingua francesa da primeira metade do século XX.

Peza que forma parte da Comedia humana de Balzac. Afonda na figura de Gobseck, prototipo do avaro, e no pasado doutra serie de senlleiros personaxes.

Unha das primeiras novelas (1859) da literatura estadounidense que escribiu unha afroamericana. Aborda o problema do maltrato e o abuso da poboación negra por parte da sociedade branca dos estados do norte.

A obra de Kobayashi, referente da literatura proletaria marxista en xaponés, é trasladable a case calquera contexto de abuso e precariedade laboral, de aí o interese para lectores e lectoras de todo o mundo e a súa tradución a decenas de linguas.