Mel de abellón

Torgny Lindgren

Torgny Lindgren naceu en 1938 en Norsjö, na provincia de Västerbotten, en Suecia. Estudou en Umeå e mudouse ao sur do país nos anos setenta para traballar como mestre. Alí, ademais da docencia, exerceu a política como representante local do Partido Socialdemócrata.

En 1973 publicaría a súa primeira novela, Övriga frågor, na que os protagonistas son precisamente os militantes do seu partido. En 1982, tras un par de obras consideradas de transición, Brännvinfursten (1979) e Skrämmer dig minuten (1981), publicaríase Ormens väg på hälleberget, libro co que acadou un grande éxito internacional.

Durante a década que vai de 1980 a 1990 o autor foi alternando as compilacións de relatos coas novelas, e sería en 1991 —ano tamén da súa entrada na Academia Sueca— cando de novo obtería o recoñecemento de crítica e público pola súa obra satírica Till sanningens lov. En 1995 publicouse a presente obra, Mel de abellón, un texto que presenta moitas das características da escrita de Lindgren e que de novo supuxo un fito na súa traxectoria como escritor; en 2001, por exemplo, a novela foi adaptada á ópera.

Xa no século XXI, Torgny Lindgren, un dos escritores suecos contemporáneos de maior éxito e proxección internacionais, publicou arredor dunha ducia de novas pezas, tanto de poesía coma de narrativa.

Morreu en Rimforsa en 2017.