A traba

Mary Cholmondeley

Mary Cholmondeley naceu en 1859 no condado inglés de Shropshire, na rexión das West Midlands. Era filla dunha ama de casa e do reverendo de Hodnet (tamén o fora o avó) e a terceira de oito irmáns. Era asmática crónica, un dos motivos polos que pasou trinta anos da súa vida na casa, coidando da nai –de saúde delicada– e colaborando nas tarefas pastorais do pai, seica un home tolerante e sociable.

En 1896, un ano despois do pasamento da nai, mudouse a Londres co pai, xa xubilado, e mais con dúas irmás, a unha casa que herdaran. En 1915 morreralle un sobriño no campo de batalla, un feito que influirá para que dous anos máis tarde a escritora decida asistir os feridos de guerra no hospital Carlton House Terrace, en Westminster. En 1921 sufrirá unha trombose cerebral que a deixará parcialmente paralizada até o día da súa morte, o 15 de xullo de 1925.

Un dos seus primeiros relatos publicados foi «Geoffrey's wife» (1885), no semanario ilustrado The Graphic. A súa primeira novela aparecería por fascículos na revista literaria Temple Bar ao longo de 1887. Dende aquela, cada dous ou tres anos volvería sacar libro novo de forma ininterrompida até verse impedida a causa do derramo que padeceu en 1921. Sen dúbida, a obra súa que quedou para a posteridade foi Red Pottage (1899), unha sátira contra a hipocrisía da relixión organizada na que aborda temas como a emancipación da muller, o adulterio ou a sexualidade (porén, a crítica Jane Crisp alude ao «conservadorismo desfasado» das súas novelas, e Vineta Colby fala do cariz «melodramático» das tramas).

Alternou cos ilustres do Londres da época e foi íntima amiga de Henry James (coma el, nunca casou). A figura e a obra de Mary Cholmondeley, durante moito tempo esquecida, está a ser revisada amplamente na actualidade, con compilacións, relatorios e estudos críticos varios como por exemplo Let the Flowers Go: A Life of Mary Cholmondeley (2009), Becoming a Woman of Letters: Myths of Authorship and Facts of the Victorian Market (2009) ou Mary Cholmondeley Reconsidered (2010).