Os salgueiros

Algernon Blackwood

Algernon Henry Blackwood naceu en Shooter's Hill, no sueste de Londres (daquela noroeste de Kent) en 1869. Era fillo dun modesto administrativo do servizo postal británico. En 1890 viaxou ao Canadá, onde traballou como granxeiro e brevemente como xerente dun hotel. Durante a súa etapa norteamericana, foi así mesmo profesor de violín, modelo, camareiro de barra ou xornalista para The New York Times.

Con trinta anos cumpridos tornou ao seu país de orixe; alí cadrou con Arthur Machen, outro referente indispensable da literatura de terror, co cal compartiu pertenza a clubs de ocultismo cabalístico e un interese maiúsculo polo sobrenatural. Comezou a escribir relatos, que máis tarde lería na radio e na televisión británicas. En 1906 publicou The Empty House and other Ghost Stories, a súa primeira compilación, mais sería coa terceira, John Silence, Physician Extraordinary (1908), coa que lograría vivir da literatura. Publicou máis de cento cincuenta relatos (a maioría en revistas como The London Magazine, The Westminster Gazette ou The Eye-Witness), algunhas novelas, obras infantís, pezas dramáticas e dúas autobiografías. Son especialmente interesantes contos como «The Camp of the Dog» (1908) ou «A Descent into Egypt» (1914); con todo, os textos de Blackwood que sen dúbida ocupan un lugar de preferencia na literatura de terror son as novelas curtas The Wendigo (1910) e este Os salgueiros (1907).

Morreu en decembro de 1951 en Beckenham, a consecuencia dunha trombose cerebral. H. P. Lovecraft considérao un dos «mestres modernos» no seu ensaio sobre o xénero intitulado Supernatural Horror in Literature (1927).