Pescador de Islandia

Pierre Loti

Pierre Loti, pseudónimo de Julien Viaud, naceu en Rochefort en 1850 no seo dunha familia modesta. En 1867 graduouse na Escola Naval e comezou unha carreira como oficial da mariña francesa que duraría máis de catro décadas e que propiciou unha azarosa vida, con algún que outro episodio controvertido e múltiples viaxes por todo o mundo.

Na súa extensa traxectoria literaria, Loti botou man das súas experiencias –recollidas no seu diario, redactado entre 1871 e 1918 e publicado postumamente– e dos seus coñecementos de rexións exóticas e civilizacións primitivas para ambientar as súas novelas. Ao chamado ciclo turco pertence Aziyadé (1879), a súa primeira novela, ambientada en Constantinopla, e a outras localizacións títulos como Le Mariage de Loti (1882), onde relata a súa viaxe a Tahití. Na Bretaña ambienta Mon frère Yves (1883) e Pescador de Islandia (1886), mentres que o País Vasco aparece en Ramuntcho (1897). A súa notoriedade valeulle un posto na Academia Goncourt en 1883 e na Academia Francesa en 1891, asento que disputou con Zola.

Retirado xa ao comezo da Primeira Guerra Mundial, volveuse incorporar ao exército para levar a cabo varias misións diplomáticas. Así mesmo, cubriu a guerra para Le Figaro e L’Illustration.

Pierre Loti, afectado de hemiplexía, morreu en Hendaia en 1923 e contou cun funeral con honras de Estado. A súa casa en Rochefort, que o autor fora transformando en vida nun espazo de inspiración oriental, converteuse nun museo.