Cita con Rama

Arthur C. Clarke

Arthur C. Clarke naceu en Minehead (Inglaterra) en 1917. Estudou física e matemáticas no King's College de Londres. Comezou a publicar a finais da década de 1940, inicialmente relatos e máis tarde tamén novelas centradas no progreso tecnolóxico.

Un dos seus relatos, «The Sentinel» («A sentinela»), serviu de base para a novela e o filme 2001: A Space Odyssey (1968), este ultimo dirixido por Stanley Kubrick. Escribiu posteriormente algunhas das obras de referencia da chamada ciencia ficción dura, entre outras esta Cita con Rama, publicada orixinalmente en 1972.

«Debémoslle o mundo a Clarke», dixo o astrónomo Phil Plait, en referencia á órbita xeoestacionaria, onde o autor británico propuxo colocar satélites de comunicación (e aí están hoxe, por exemplo, o norteamericano GPS, o ruso GLONASS ou o europeo e moi moderno sistema Galileo ou GNSS). Mesmo a NASA, que non adoita facer estas cousas, quitou un comunicado oficial co gallo do seu falecemento en marzo de 2008 en Colombo (Sri Lanka), o seu lugar de residencia durante máis de media vida.