A casa e o cerebro

Edward Bulwer-Lytton

Edward George Bulwer-Lytton naceu en Londres en 1803, nunha familia de aristócratas. Tras morrerlle o seu pai cando tiña só catro anos, a súa nai optou por radicarse en Londres de maneira permanente e enviar o petís a varios internados, para finalmente, en 1822, entrar no Trinity College de Cambridge, se ben de aí axiña pasou ao Trinity Hall. Licenciouse en Artes en 1826, e foi tamén ese ano cando publicou un primeiro libro de poemas, Weeds and Wild Flowers. A partir da década de 1830 participou activamente na política británica, e chegou a ser Secretario de Estado para Colonias en 1858. Esa actividade compaxinouna cunha popular e prolífica carreira de escritor (tocou todos os xéneros). Da súa produción cómpre destacar a novela Eugène Aram (1832) e sobre todo a novela histórica The Last Days of Pompeii (1834). Tamén, por suposto, a súa interesante contribución á literatura de terror sobrenatural, con multitude de contos e novelas curtas, entre as cales posiblemente A casa e o cerebro (1859) sexa a máis destacada. Por último e a modo de curiosidade, cabe sinalar que debemos a Bulwer-Lytton o coñecido íncipit «It was a dark and stormy night» (co cal abre a novela de 1830 intitulada Paul Clifford), amplamente instalado na lingua inglesa como arquetipo de prosa melodramática e rimbombante. Así pois, non é estraño que o estadounidense H. P. Lovecraft destacase, á par ca o seu incuestionable talento, a súa tendencia á «retórica pomposa e ao romanticismo vacuo». Tras un longo período de convalecencia, faleceu en Devon en xaneiro de 1873 polas complicacións derivadas dun tratamento para a xordeira que padecía.