A industria do sexo e do peixe empanado

Emmanuel Pierrat

Emmanuel Pierrat naceu en Nogent-sur-Marne en 1968 e compaxina a súa actividade profesional como avogado especialista nos dereitos de propiedade intelectual, co labor de editor, novelista, bibliófilo, coleccionista, tradutor e ensaísta. Ademais de impartir aulas na Universidade París 13, en tanto editor, fundou en 2004, canda outros socios, as editoriais Privé e Cartouche, e dirixe a colección «L'Enfer» para o selo Flammarion.

Cun considerable número de publicacións relacionadas cos dereitos de edición, a pirataría ou a liberdade de expresión, no seu haber constan varios estudos arredor doutra das súas paixóns: a literatura erótica e, xa que logo, a censura.

Do seu labor como escritor de ficción forman parte un bo feixe de novelas e relatos, algúns deles traducidos a linguas coma o grego, o vietnamita, o romanés, o alemán, o inglés ou o bengalí. Entre os seus títulos salientan Histoire d'eaux (2002), La Course au tigre (2003), Les dix gros blancs (2005), Fin de pistes (2006), Troublé de l'éveil (2008), Maître de soi (2010) ou La Féticheuse (2012).

Esta obra de insólito título, A industria do sexo e do peixe empanado, cuxa edición orixinal apareceu en 2004, supón o seu primeiro libro traducido ao galego.