O doutor Héraclius Gloss

Guy de Maupassant

Guy de Maupassant naceu en 1850 en Tourville-sur-Arques (Normandía). fillo de pais separados, por desexo da nai recibiu unha educación relixiosa (aí nacería a súa hostilidade contra o catolicismo) en Yvetot, para máis tarde proseguir os anos de liceo en Ruán.

Con respecto aos estudos superiores, comezou Dereito en París, carreira que abandonou un ano máis tarde para se enrolar na intendencia normanda na guerra franco-prusiana. Cómpre sinalar que o escritor Gustave Flaubert, pola amizade que tiña coa súa nai, o acolleu e protexeu, mesmo como a un fillo. Así, as primeiras colaboracións de Maupassant na prensa (por exemplo, en Le figaro, en L´Écho de Paris ou en Le Gaulois) foron posibles grazas á mediación de Flaubert, e tamén ao contacto con numerosos persoeiros da época, como Émile Zola, Henry James ou o ruso Ivan Turguenev.

A primeira grande obra de Maupassant —e aínda hoxe unha das máis célebres— foi o relato «Bóla de sebo» (1880), inserido no volume Les Soirées de Médan. Maupassant está considerado, de feito, un xenio do conto (asinou máis de douscentos, entre os que figuran algúns longos, como por exemplo este O doutor Héraclius Gloss, máis ben unha novela curta). Na súa obra trata en profundidade, case sempre dende unha óptica naturalista, a cuestión da crueldade no ser humano. Seis son as obras que conforman a súa produción novelística: Une vie (1883), Bel-Ami (1885), Pierre et Jean e Mont-Oriol (1887), Fort comme la mort (1889) e Notre cœur (1890).

Padeceu graves crises nerviosas ao longo da súa vida. En consecuencia, en xaneiro de 1892, tras un intento de suicidio en Cannes, foi trasladado ao manicomio de París, onde morrería ano e medio máis tarde, en xullo de 1893, a causa dunha parálise xeral, tras un período prolongado de inconsciencia.