Nova Atlántida

Francis Bacon

Francis Bacon naceu en Londres en 1561, no seo dunha familia de posibles. Os seus pais trataron de educalo no puritanismo, se ben o mozo pronto se mostrou en contra de tales postulados. Máis tarde estudou en Cambridge, e a seguir na prestixiosa escola de Dereito de Gray’s Inn. Concluído ese periplo, comezou outro como viaxeiro, por Francia, Italia e España, interrompido pola morte do pai e a conseguinte volta a Inglaterra. Unha vez alí, non deixou de estar presente na esfera pública, polo seu talento como filósofo, político e home de ciencia.

Da súa contribución ás letras, cabe destacar a publicación de Novum organum (1620), onde dá conta do método lóxico-indutivo, que o converteu nun dos iniciadores do pensamento científico moderno. Así mesmo, está considerado o pai do empirismo, e fálase del como o introdutor do xénero ensaístico na lingua inglesa (a semellanza dos escritos de Montaigne), coas diversas edicións de Essays (1597, 1612, 1625). No campo da ficción, Nova Atlántida é a súa única obra, cuxa versión latina só viu a luz de maneira póstuma.

Os últimos anos da súa vida dedicounos, tras abandonar por diversos problemas a súa intensa actividade política, ao estudo dos efectos do frío na conservación efectiva dos alimentos. Morreu en Middlesex en abril de 1626, a consecuencia dunha pneumonía.