Angel Esquire

Edgar Wallace

Edgar Wallace naceu en Greenwich (Inglaterra) en 1875. Deixou a escola aos doce anos para desempeñar distintos oficios antes de marchar a África do Sur, onde traballou como correspondente para a axencia Reuters durante a Guerra dos Bóers e máis tarde como director en Johannesburgo do xornal Rand Daily Mail.

Regresou posteriormente a Inglaterra, onde continuou activo no mundo do xornalismo, chegando a colaborar en máis de cincuenta publicacións periódicas de diversos países de fala inglesa. A partir de 1927, presidiu a xunta directiva da compañía cinematográfica British Lion Film Corporation. En 1931 foi candidato ao Parlamento do seu país polos liberais, sen éxito. Aquel mesmo ano marchou a Hollywood, onde falecería en 1932, despois de escribir o bosquexo para o guión orixinal de King Kong.

Inaugurou a produción das súas máis de cen novelas en 1905, coa celebrada The Four Just Men. Moitas das súas obras de misterio e suspense foron auténticos supervendas, e parte foron levadas ao cinema, como é o caso da presente novela, Angel Esquire.

Na actualidade, a modo de homenaxe, hai nun dos extremos da Fleet Street londiniense un busto do persoeiro que rememora o seu paso polas redaccións xornalísticas antes de acadar sona mundial como autor de ficción.