O crime de Psichiko

Pavlos Nirvanas

Pavlos Nirvanas, pseudónimo literario de Petros Apostolidis, naceu en Mariupol en 1866, no seo
dunha familia próspera. Aos sete anos, o seu pai, comerciante, trasladou o seu negocio a Grecia, o
que motivou a mudanza da familia ao Pireo. Tras cursar Medicina en Atenas, entrou na armada
grega co grao de cirurxián asistente, onde permaneceu até 1922, ano no que se retirou co grao de oficial médico e co cargo de presidente do Consello Supremo de Sanidade da Armada e xefe de
departamento do Ministerio de Mariña.

Foi un recoñecido columnista de prensa baixo o pseudónimo de Kirios Asofos; ademais, elaborou
libros escolares co propósito de reformar a escola e escribiu dous tratados médicos. A súa vinculación coa literatura remóntase á mocidade, pois xa aos dezaseis anos dera a coñecer versos e
pezas en prosa en xornais do Pireo, ademais de frecuentar o salón do poeta e dramaturgo Kostis
Palamas. Debutou na literatura coa colección de poemas Dafnai eis tin 25in Martiou (1884), á
que cómpre engadir unha segunda, Paga laleousa (1907), e obras publicadas en revistas literarias.
Tamén participou, como membro da Sociedade dos Doce, na publicación satírica Athinai. Máis
adiante redactaría estudos e tratados críticos, relatos, obras teatrais e dúas traducións: unha de
Platón e outra do escandinavo Knut Hamsun. En 1923 foi distinguido coa Medalla das Artes e das
Letras, e en 1928 ingresou na Academia de Atenas. Malia a serie de tics que padecía e que nunca chegou a controlar, destacou pola súa brillante conversa e o seu talento para contar historias.

Como consecuencia dunha broncopneumonía que arrastraba, morreu o 29 de novembro de 1937, e foi soterrado con honores.