Hugin e Munin, editorial fundada en 2011 e especializada na narrativa traducida, ten por obxecto introducir no mercado galego unha serie de títulos de literatura estranxeira de prestixio. O réxime de edición é aquel común aos clubs ou círculos de lectura, é dicir, está sustentado sobre unha base de subscritores que permita a publicación de oito libros ao ano, a razón de dúas obras por trimestre.

As literaturas inglesa, francesa, alemá e italiana, as literaturas nórdicas e as literaturas minorizadas son en principio os nosos campos de batalla; con todo e iso, tamén pescamos puntualmente noutras linguas e sistemas literarios, como o ruso, o xaponés, o croata ou o grego. A priori, non hai literatura que non nos interese. O mesmo reza para os xéneros: novela negra, de ciencia ficción, psicolóxica, de aventuras, realista, colonial etc. Escolmamos as obras en función só da súa calidade.

Así, comparten a colección Principal escritores como Raymond Chandler, Anita Brookner, Takiji Kobayashi, Bernhard Schlink, Siri Hustvedt, Arthur Schnitzler, Mary Wollstonecraft, Ioanna Karistiani, Isaac Asimov, Albert Camus, Gustave Flaubert ou August Strindberg… mentres que na colección Vólvense os paxaros contra as escopetas figuran autores como Guy de Maupassant, Mary Cholmondeley, Wilkie Collins, Milovan Glišić ou Johannes Kepler.

Tanto o deseño das cubertas coma o coido na revisión e a maquetaxe interiores dos libros son para nós elementos fundamentais da engrenaxe editorial. Este é un denominador común de ambas as coleccións; isto é, a colección Principal, de publicación periódica, destinada de maneira preferente aos subscritores, e unha segunda denominada Vólvense os paxaros contra as escopetas, na que pouco e pouco incluímos obras de narrativa que por algún motivo non encaixan co criterio fixado para a colección orientada aos subscritores; non por unha cuestión de calidade literaria, as razóns cómpre buscalas na extensión, na temática ou no formato.