A señorita Else

Arthur Schnitzler

Arthur Schnitzler naceu en Viena en 1862 no seo dunha familia xudía de posibles. Estudou Medicina e exerceu a profesión até 1894, momento no que se centraría en exclusiva na literatura. Fundou, canda Hugo von Hofmannsthal e outros autores, a sociedade literaria Jung-Wien, activa entre 1890 e 1897; os seus integrantes propuñan unha ruptura co naturalismo e a asunción dos postulados modernistas, con pinceladas simbolistas e impresionistas.

Como dramaturgo, destacou por reflectir con precisión a suntuosidade e a febleza moral da sociedade vienesa do momento, sobre todo nas pezas da primeira etapa, como Anatol (1893) ou A cacatúa verde (1898). Como narrador, é indiscutible a súa mestría á hora de tecer a psicoloxía dos personaxes; explorou a fondo as relacións entre homes e mulleres, como en Traumnovelle (1926); o antisemitismo, presente en Der Weg ins Freie (1908); a morte, tema central en Casanovas Heimfahrt (1917); ou a presión social e a subordinación feminina, cuestións capitais nesta A señorita Else (1924). Cabe mencionar ademais que o escritor austríaco foi o introdutor da técnica do monólogo interior na literatura en lingua alemá, en concreto na obra Lieutenant Gustl (1900).

Tal e como a miúdo se sinala, Arthur Schnitzler é ás letras o que Sigmund Freud á psicoloxía. Non en van, ambos os dous mantiveron unha estreita relación de amizade, fundamentada sobre a admiración mutua.

Schnitzler morreu en outubro de 1931 en Viena, a consecuencia dun derramo cerebral.